FW: مكتب الهاشم للسياحة والسفر

 

 

 

---

Date: Wed, 24 Jun 2009 19:48:48 +0300
Subject:  مكتب الهاشم للسياحة والسفر
From: meedoo.ksa@gmail.com

 

بسم الله الرحمن الرحيم

 

السلام عليكم ورحمة الله وبركاته

 

((( أرجــو القراءة كااااااااااملــة)))

 

 

أقسم بالله العظيم إن كل الكلام صحيح ولا زدت أو بالغت فيه... انا يــا فــهــد الخــالدي

 

مكتب الهاشم للسياحة والسفر
المكتب الرئيسي : الأحساء

لهم فرع في الخبر... شارع الملك عبدالعزيز.. قبل غرناطة للرياضة.. تعرفهم من لوحة الاعلانات الالكترونية....هنود... وفلبيني.. ومديرهم سوداني إسمه (مبارك الخير إدريس)

 

البداية في نهايات شهر فبراير... أنا كنت حاجز عن طريق آسيا روومز (www.asiarooms.com).. فنادق كلها 5 نجوم... لكن الشيطان خلاني ألغي الحجوزات لأنها أول مرة... رحت لهم في فرع الخبر.. ورحت للسوداني.. اعطيته الجدول إللي أبغاه بالفنادق وانواع الغرف... والسوداني اعطاني عرض حلو ((بعد ما خلاني أغيّر فندقين)).. اتفقنا على الخطوط الاماراتية.. وكانت التذكرة بـ 3400 ريال... أنواع الكلام المعسول والوعود... بعدها طلب السوداني منّي عربون 10 آلاف ريال... بس أنا أعطيته 5 آلاف ريال... لحد ما تتأكد الحجوزات وأعطيه الباقي... اتفقنا إن عمولة المكتب 1250 ريال...

 

جلست أسبوعين وأنا كل يومين أدق وهو يقول للحين ما تأكدت كل الحجوزات.. ويتعذر إنه سافر لدبي وفيه زباين غيري ومن هالكلام....

 

بعد تقريباً 16 يوم كلمني وقال إن الحجوزات تأكدت ((وفيه غرف غيّـرها من عنده)) لأن إللي طلبتها مو متوفره... أنا وافقت لأن فكرتي عن الفنادق... كانت للنوم...قلت له خلاص بأجيك أكمّـل باقي المبلغ وآخذ الفواتير... قال لسّـه التذاكر ما حجزتها... سألته ليه.. قال والله نسيت... قلت طيب احجزها... قال.. أنا شيّـتهم وصارو بـ 5000 ريال... قلت أنا لما حجزت كانت بـ 3400 ريال.. وهذا الكلام له أكثر من اسبوعين.. قال والله ما أقدر.. لكن أشوف لك خطوط ثانية.. قلت له خلاص أنا راح أدبّـر التذاكر..

 

بعدها بكم يوم تغيّــر تاريخ الزواج ((تقدم)) اسبوعين... قلت خيره.. كلمت السوداني... وقلت له غيّر لي تواريخ الحجوزات (فقط).. قال إذا كذا ما راح تنلغي الحجوزات... ويتغير تاريخ الحجز... قلت حلو.. وما قصرت.... قلت له لو أغيّـر الفنادق وش يصير... قال فيه رسوم إلغاء.. قلت طيب طبعاً غيّـرت فندقين... مع تقديم تواريخ الحجوزات الباقية...  اكتشفت إن الباكج ((فنادق)).. تقريباً 13 ألف ريال... مع عمولة المكتب.. 14250 ريال... ((واجد)) رحت وشيّت في موقع (أجـودا) (www.agoda.com) .. ولقيت إن نفس الحجوزات تكلفني 12 ألف ريال... فرق 2250 ريال... رسلت له جدول مقارنه بين التسعيرات.. قال ما أقدر أخدمك فيها...

 

طلبت إلغاء الباكج...  وقال لي خلاص راح أخلص لك المعاملة عشان تستلم المقدم إللي دفعته... أسبوع كامل أدق عليه يتهرب... ولما كلمت قسم المحاسبة في المكتب الرئيسي في الاحساء.. رد عليّ فلبيني إسمه (جوري).. وشرحت له كل شيء... وقال إن المكتب يحجز عن طريق شركة سياحية مو دايركت من الفنادق... وإن الشركة السياحية... راح تخصم عليّ رسوم إلغاء الحجوزات إللي قبل..

 

لاحظو يا أخوان إن الحجوزات إللي ألغيتها كانت الأولى فقط... أما الجدول الثاني... ما طلبت منه يحجز لي.... أخذت التسعيرة.. وما عجبتني... وقلت له لا تحجز لحد ما أقول لك..

 

 

اليوم السبت 30-05-2009 ..الساعة 04:54 العصر... كلمني الفلبيني (جوري) وقال إن الشركة السياحية رجعت الفلوس وإن الخصم (950 ريال)... حاولت أفهم منه ليه... قال ما عندي انترنت.. لكن كلم السوداني في الخبر وهو عنده الخبر الأكيد... كلمته... وقال إن المبلغ 950 ريال... قلت له ليه... قال هذا من الشركة السياحية... قلت له طيب عطني اسمهم عشان أكلمهم وأتفاهم معهم.. لأن رسوم الإلغاء ثاااااابته (15 دولار) لو كان الالغاء قبل الحجز باسبوع... وانا الغيت قبله بـ شهر ونص... قال طيب تعال عندي ونتفاهم... قلت له. ما راح أجيك من الجبيل... عشان نتهاوش.. لازم نتفق... قال 950 ريال... هذا نظام الشركة... واحنا وسيط.. قلت طيب. عطني اسمهم... تهرب منّــي... قلت له أنا بكره راح أشتكيكم في محكمة الخبر وراح أفضحكم في الانترنت.. قال إنت تعال عندي ويصير خير.. قلت له عطني تفصيل الـ 950 ريال... قال انا عندي زبون وصاحب المكتب راح يجي بعد المغرب راح أخليه يكلمك..

 

وألحين الساعة 9 بالليل... وما أحد كلمني...

 

هذا كل إللي صار معي... والله ثم والله ما كذبت بأي شيء عليهم.. لأن مالي مصلحه من تشويه مصلحتهم..

 

لكن إذا الدعوة نصب وإحتيال انا لهم...

 

تكفون إللي توصل له الرسالة... يرسلها لأكبر عدد من إللي عنده... ويرسلها للقروبات عشان نفضح ذا الحرامية

 

والسلام عليكم

 

 

---

What can you do with the new Windows Live? Find out
--~--~---------~--~----~------------~-------~--~----~
لقد تلقيت هذه الرسالة لأنك مشترك في مجموعات Google‏

مجموعة "قروب المدينة المنورة".

لإرسال هذا إلى هذه المجموعة، قم بإرسال بريد إلكتروني إلى
madina55@googlegroups.com
لإلغاء الاشتراك في هذه المجموعة، ابعث برسالة إلكترونية إلى
madina55+unsubscribe@googlegroups.com
لخيارات أكثر، الرجاء زيارة المجموعة على
http://groups.google.com.sa/group/madina55?hl=ar

منتديات المدينة المنورة اون لاين

http://www.md55.com/vb
-~----------~----~----~----~------~----~------~--~---